امریکی سرمایہ کاروں کے لیے پاکستان پرکشش مارکیٹ،پاکستانی سفیر رضوان سعید شیخ

واشنگٹن(پناہ نیوز)امریکہ میں پاکستانی سفیر رضوان سعید شیخ نے کہا ہے کہ پاکستان امریکی کاروباری برادری اور سرمایہ کاروں کے لیے آئی ٹی، توانائی اور معدنیات جیسے شعبوں میں زبردست منافع بخش مواقع فراہم کرتا ہے۔ انہوں نے کہا کہ موجودہ دور میں جبکہ دونوں ممالک کی قیادت اقتصادی تعاون کے فروغ کے حوالے سے پرعزم ہے، ہم امریکی سرمایہ کاروں اور 250 ملین کی ایک متحرک مارکیٹ کا فائدہ اٹھانے والے خواہشمند کاروباری افراد اور سرمایہ کاروں کے لیے ایک سازگار اور سرمایہ کار دوست ماحول فراہم کرنے کے لیے پوری طرح سے پرعزم ہیں۔سفیر پاکستان نے مزید کہا کہ تذویراتی طور پر پاکستان جنوبی ایشیا، وسطی ایشیا اور مشرق وسطیٰ کے سنگم پر واقع ہے، ہمارا ملک ایک اہم تجارتی راہداری فراہم کرتا ہےجو امریکی کاروباری اداروں کو توانائی سے مالا مال وسطی ایشیائی منڈیوں اورسرمایے کی حامل خلیجی ریاستوں سے رابطے کی پیشکش کرتا ہے۔سفیر پاکستان نے یہ باتیں ییل سکول آف مینجمنٹ کے ایک وفد سے ملاقات کے دوران کہیں۔اجلاس کو بتایا گیا کہ یونائیٹڈ سٹیٹس پاکستان بزنس الائنس ییل سکول آف مینجمنٹ کے 35 رکنی طلباء کے وفد کو پاکستان کے دورے میں سہولت فراہم کر رہا ہے۔ اس دورے کا مقصد پاکستان میں موجود کاروباری مواقع کو دیکھنا، پالیسی سازوں کے ساتھ بات چیت کرنا اور سرمایہ کاری کے امکانات کا جائزہ لینا ہے۔ یہ اقدام پاکستان کے کاروباری ماحول کا جائزہ لینے اور مضبوط اور طویل مدتی اقتصادی شراکت داری کی راہوں کی نشاندہی کرنے میں بڑھتی ہوئی دلچسپی کی عکاسی کرتا ہے۔وفد سے خطاب کرتے ہوئے سفیر پاکستان رضوان سعید شیخ نے حالیہ دور میں پاک امریکہ تعلقات میں ہونے والی مثبت پیش رفت خصوصاً تجارت اور سرمایہ کاری کو مضبوط بنانے کے لیے جاری کوششوں کو اجاگر کیاانہوں نے اس بات پر زور دیا کہ پاکستان نے سیاحت، زراعت، توانائی، مینوفیکچرنگ اور انفارمیشن ٹیکنالوجی کے شعبوں میں قابل قدر مواقع موجود ہیں ۔ اس تناظر میں سفیر پاکستان نے لاگت اور کوالٹی کے ضمن پاکستان کے تقابلی فوائد کو اجاگر کیا۔سفیر پاکستان نے ملک کے ٹیک سیوی (ٹیکنالوجی کے ماہر ) نوجوانوں کو ، جو ملکی آبادی کا سب سے بڑاحصہ ہیں، کو ایک اہم قومی اثاثہ قرار دیتے ہوئے زور دیا کہ پاکستان کی باصلاحیت افرادی قوت امریکی مارکیٹ کی بڑھتی ہوئی ضروریات خاص طور پر کاروبار اور ٹیک انٹرپرینیورز کی ڈیمانڈ کو پورا کر سکتی ہے۔انہوں نے کاروبار میں آسانیاں پیدا کرنے اور غیر ملکی سرمایہ کاری کو راغب کرنے کے لیے حکومت پاکستان کی طرف سے کیے گئے مختلف پالیسی اقدامات خصوصاً ایس آئی ایف سی کے کردار کا خصوصی ذکر کیا۔سفیر پاکستان نے کہا کہ پاکستان میں 80 سے زائد امریکی کمپنیوں کی کامیابی ملک کی وسیع اقتصادی صلاحیت کی گواہی دیتی ہے۔انہوں نے یونائیٹڈ سٹیٹس پاکستان بزنس الائنس کی طرف سے ییل وفد کے دورے کے انتظام کا خیرمقدم کیا اور دورے کے دوران سفارت خانے کی جانب سے مکمل تعاون اور سہولت کاری کا یقین دلایا۔وفد نے بریفنگ پر سفیر پاکستان کا شکریہ ادا کیا.